తిరుమలలో గవర్నర్ తమిళసై కీలక వ్యాఖ్యలు
వరంగల్ టైమ్స్, తిరుపతి : తెలంగాణ గవర్నర్ తమిళిసై తిరుమల శ్రీవారిని దర్శించుకున్నారు. బుధవారం ఉదయం స్వామి వారి వీఐపీ విరామ సమయంలో స్వామి వారి సేవలో పాల్గొని మొక్కులు చెల్లించుకున్నారు. ముందుగా ఆలయ మహాద్వారం వద్దకు చేరుకున్న ఆమెకు టీటీడీ ఈవో ఏవి.ధర్మారెడ్డి స్వాగతం పలికి దర్శన ఏర్పాట్లు చేశారు. దర్శనానంతరం వీరికి ఆలయ రంగనాయకుల మండపంలో వేద పండితులు వేద ఆశీర్వాదం అందించారు. ఆలయ అధికారులు గవర్నర్ తమిళిసైని పట్టు వస్త్రంతో సత్కరించి స్వామి వారి తీర్ధ ప్రసాదాలు అందజేశారు. రెండు తెలుగు రాష్ట్రాల ప్రజలంతా బాగుండాలని వేంకటేశ్వర స్వామిని కోరుకున్నట్లు గవర్నర్ చెప్పారు.
బ్రేక్ సమయంలో మార్పు తీసుకురావడం చాలా మంచి నిర్ణయమన్నారు.సామాన్య భక్తులకు ప్రాధాన్యత ఇచ్చి దేవుని ముందు అందరూ సమానమే అంటూ టీటీడీ తీసుకున్న నిర్ణయం ఆనందదాయకమని ప్రశంసించారు.తెలంగాణ ప్రభుత్వం నుంచి ఆహ్వానం లేకపోవడంతోనే అంబేద్కర్ విగ్రహ ఆవిష్కరణ, సచివాలయం ప్రారంభోత్సవాలకు హజరు కాలేదని చెప్పారు.ఆహ్వనించామని వారు పేర్కోనడంతోనే తాను ఆహ్వానం అందలేదని చెప్పాల్సి వచ్చిందన్నారు.ఆహ్వానం పంపలేదని తాను ఎవరిని అడగలేదని గవర్నర్ అన్నారు.
